На Конститутивно-изборната седница на Собранието на Црвен крст на Република Северна Македонија, д-р Лилјана Ристевска е избрана за претседател на организацијата за нов четиригодишен мандат.
Со оваа одлука, Ристевска станува првата жена која ќе застане на чело на Црвениот крст на Република Северна Македонија од осамостојувањето на државата, што претставува значаен историски момент за најголемата хуманитарна организација во земјата.
Нејзиниот избор е признание за долгогодишната посветеност, професионалност и активниот придонес во развојот на организацијата. Зад себе има повеќе од две децении искуство во Црвениот крст, започнувајќи како волонтер, потоа како претседател на Општинската организација на Црвен крст во Битола, а во изминатиот период ја извршуваше и функцијата потпретседател на националното друштво.
Во својот нов мандат, д-р Ристевска најавува визија за модерен, посилен и поотворен Црвен крст, подготвен да одговори на современите хуманитарни предизвици и потребите на граѓаните.
Приоритетите во следните четири години ќе бидат насочени кон јакнење на волонтерството и членството, развој на локалните организации, унапредување на хуманитарните услуги, транспарентно управување и зацврстување на партнерствата во земјата и во рамките на меѓународното хуманитарно движење.
Изборот на првата жена претседател по осамостојувањето на Македонија се оценува како важен чекор кон унапредување на еднаквите можности и лидерството во хуманитарниот сектор, продолжувајќи ја мисијата на Црвениот крст – да им служи на луѓето со хуманост, непристрасност и солидарност.
