Репрезентацијата на Босна и Херцеговина со големи очекувања ги завршува подготовките за својот втор настап на Светско првенство, а фудбалската еуфорија веќе ја обединува јавноста во земјата. Според анализите изнесени во емисијата „Мундокаст“, во која гостуваа спортски новинари од бошњачката заедница, избраниците на селекторот Сергеј Барбарез имаат реални шанси да ја минат групната фаза.
Босна и Херцеговина на Мундијалот пристигнува со една од најмладите селекции во Европа. Со просечна возраст од 26,9 години, тимот е четврта најмлада европска репрезентација на турнирот. Во составот се комбинирани млади фудбалери желни за докажување и искусни лидери, предводени од капитенот Един Џеко, кој и понатаму има клучна улога во играта и атмосферата во националниот тим.
Според аналитичарите, најголемата предност на „Змејовите“ е нивната психолошка стабилност и фактот што настапуваат без голем резултатски притисок. Тоа веќе беше потврдено на пријателските натпревари против Велс и Италија, каде репрезентацијата покажа карактер и успеа да направи резултатски пресврти.
Групата во која се наоѓаат заедно со Канада, Швајцарија и Катар се оценува како поволна за борба за место во осминафиналето. Клучен ќе биде воведниот натпревар против домаќинот Канада, кој и покрај отсуството на повредениот Алфонсо Дејвис ќе ја има предноста на домашниот терен и поддршката од трибините.
Швајцарија важи за главен фаворит во групата благодарение на својата дисциплинирана и цврста дефанзивна игра, додека Катар е оценет како аутсајдер. Сепак, аналитичарите предупредуваат дека селекцијата не смее да се потцени, особено поради искуството на стратегот Хулен Лопетеги.
Општата оценка е дека оваа генерација на Босна и Херцеговина има квалитет, енергија и потенцијал да ја помине групната фаза и конечно да го избрише горчливиот спомен од Светското првенство во 2014 година, кога репрезентацијата остана без пласман понатаму по контроверзниот пораз од Нигерија.
