БЕЛОРУСИЈА вчера започна четиридневни воени вежби во близина на границите со Полска и Литванија, во кои учествуваат механизирани и тенковски единици. Според официјалните информации, војниците вежбаат заштита на границите, одбрана од напади со беспилотни летала и лесни авиони, пренесува „Еуроњуз“ .
Локацијата на вежбите е од стратешко значење. Дел од вежбите се одржуваат во близина на Коридорот Сувалки, тесен појас земја помеѓу Полска и Литванија што НАТО го смета за клучна точка. Активностите се концентрирани на полигонот Хожа, кој се наоѓа веднаш до литванската граница, и на полигоните Бжески и Рожански, кои се оддалечени приближно 15 и 60 километри од полската граница, соодветно.
Сувалскиот коридор, лента долга 104 километри на полско-литванската граница, претставува единствена копнена врска меѓу балтичките држави и остатокот од НАТО алијансата, а во исто време ја одвојува Белорусија од руската енклава Калининград. Затоа се смета за една од најчувствителните области за европската безбедност.
„Нема причина за грижа“
Белоруските власти велат дека нема причина за загриженост и ги опишуваат вежбите како „исклучиво одбранбени“. Министерството за одбрана тврди дека бројот на учесници и количината на воена опрема не ги надминуваат ограничувањата дефинирани со Виенскиот документ од 2011 година, поради што не биле обврзани однапред да ги известат другите земји. Сепак, точниот број на војници што учествуваат во маневрите не е објавен.
Овие вежби се дел од поширок тест на борбената готовност на белоруските вооружени сили. На 11 септември, претседателот Александар Лукашенко го посети полигонот Обуз-Лесновски во близина на Барановичи и изјави дека сака да го провери функционирањето на целиот сектор за национална безбедност.
