Skip to main content
Македонија

АВМУ: Да се почитуваат највисоките професионални и етички стандарди при информирање за погребите на жртвите од пожарот во Кочани

19/03/2025  14:58

Агенцијата за аудио и аудиовизуелни медиумски услуги (АВМУ) ги потсетува медиумите, при информирањето за погребите на жртвите во трагичниот пожар во Кочани, да се придржуваат до највисоките професионални и етички стандарди.

Регулаторното тело оценува дека генерално, деновиве медиумите покажале висок степен на професионалност. Регистрирани се неколку случаи на емитување филмови и серии со забавна содржина, за што се доставени и претставки до Агенцијата, поради што посочуваат радиодифузерите да обрнат поголемо внимание при креирањето на програмската шема. Истовремено, нагласуваат дека важно е и класичната музика која се емитува да биде соодветна на деновите на жалост.

АВМУ воедно апелира до медиумите да им ја пружат потребната поддршка на нивните медиумски работници кои изминативе деновиве при извршувањето на нивните работни обврски се изложени на исклучителен стрес и, со тоа, на здравствени ризици.