Авиоиндустријата е во најлошата криза од пандемијата, предупредуваат лидерите во индустријата, бидејќи војната на Блискиот Исток ги парализира летовите, ја уништува вредноста на компаниите и ги зголемува цените на горивата на рекордно ниво.
Како што конфликтот влегува во четвртата недела, авиокомпаниите најавуваат неизбежно зголемување на цените на билетите, бидејќи повеќе не можат да го амортизираат ненадејното зголемување на трошоците, јавуваат медиумите.
„Горивото значително се зголеми по инвазијата на Украина во 2022 година, но ова отиде уште подалеку“, рече извршниот директор на „ИзиЏет“, Кентон Џарвис, предупредувајќи дека ова е најтешкиот удар за индустријата од 2020 година. Шефот на „Луфтханза“, Карстен Спор, го вели истото: „Нашиот просечен профит по патник е околу 10 евра. Нема начин да ги апсорбираме овие трошоци“, што практично потврдува дека поскапите билети се неизбежни.
Инвеститорите веќе реагираа – пазарната вредност на најголемите авиокомпании во светот падна за повеќе од 50 милијарди долари, додека сè повеќе се инвестира во облози за понатамошен пад на акциите. Особено се погодени авиокомпаниите од Блискиот Исток како што се „Емирати“, „Етихад“ и „Катар“, кои мораа да ги намалат летовите поради затворениот воздушен простор и колапсот на туризмот.
Кризата се прелева во товарниот транспорт и снабдувањето, а некои компании веќе размислуваат за намалување на линиите и кризни планови поради можен недостиг на гориво. Сепак, во индустријата постои и надеж дека пазарот би можел брзо да се опорави откако ќе заврши конфликтот, иако нема индикации дека тоа ќе се случи наскоро.
