Skip to main content
Македонија

Алиу:Oбезбедена медицинска опрема вредна половина милион долари за четири болници

29/04/2026  12:55

Министерот за здравство, Азир Алиу, денеска изјави дека е обезбедена современа медицинска опрема вредна половина милион долари за четири болници – во Гостивар, Велес, Струмица и Струга, во партнерство со Проект ХОПЕ.

Тој посочи дека станува збор за ехо апарати, инкубатори, вормери, монитори за пациенти и новороденчиња, ЦТГ апарати, инфузиони пумпи, родилни кревети, апаратура за фототерапија и друга медицинска опрема, обезбедена како резултат на долгорочното партнерство во проектот Перимак.

Во рамки на оваа соработка досега е обезбедена медицинска опрема во вредност над 3,5 милиони американски долари и се обучени повеќе од 1.000 здравствени работници.

„Како Министерство за здравство, нашата определба е регионалните болници да бидат силни, функционални и добро опремени. Затоа, секоја ваква поддршка ја гледаме како дел од пошироката политика за подостапно и поквалитетно здравство во целата држава“, додаде министерот Алиу кој упати благодарност до Проект ХОПЕ за континуираната поддршка.