Белата куќа верува дека е блиску до постигнување договор со Иран за меморандум за разбирање од една страница, со кој би се ставил крај на војната и би се поставила рамка за подетални преговори за нуклеарната програма на Иран, изјавија за „Аксиос“ двајца американски претставници и двајца други извори запознаени со преговорите.
Американската страна очекува Иран да одговори на неколку клучни точки во следните 48 часа. Сè уште ништо не е договорено, но изворите велат дека разговорите сега се најблиску до договор од почетокот на војната.
Според нацрт-договорот, Иран би се согласил на мораториум за збогатување на ураниум, САД би ги укинале санкциите и би ослободиле милијарди долари замрзнати ирански средства, а двете страни би ги укинале ограничувањата за премин низ Ормутскиот теснец.
Трамп ја прекина операцијата за да го спаси кревкото примирје
Голем дел од одредбите на меморандумот би биле условени од постигнување конечен договор, што значи дека сè уште постои можност за продолжување на војната или продолжен застој во кој отворениот конфликт би бил запрен, но без вистинско решение, пишува „Аксиос“.
Во исто време, Белата куќа верува дека иранското раководство е поделено и дека би можело да биде тешко да се постигне консензус меѓу различните фракции во владата. Некои американски претставници сè уште се сомневаат дека ќе се постигне дури и почетен договор.
Американските претставници претходно изразија оптимизам за можен договор за време на преговорите, но без конечен успех. Сепак, двајца американски претставници тврдат дека одлуката на американскиот претседател Доналд Трамп да ја запре новата операција во Ормутскиот теснец и да избегне пропаѓање на кревкиот прекин на огнот е донесена токму поради напредокот во преговорите.
