Активисти депортирани од Израел откако се придружија на флотилата за помош за Газа излегоа со сериозни обвинувања за злоупотреба од страна на израелските сили, објави Ал Џезира. Според нив, за време на притворот, климатската активистка Грета Тунберг била малтретирана, влечена по земја и присилена да го бакне израелското знаме.
Турските власти потврдија дека во саботата во Истанбул пристигнале 137 депортирани лица, меѓу кои 36 турски државјани и активисти од САД, Италија, Малезија, Кувајт, Швајцарија, Тунис, Либија и Јордан.
Турскиот новинар Ерсин Челик, учесник во операцијата „Флотила Сумуд“, изјави дека лично бил сведок на мачењето на Тунберг, додека малезискиот активист Хазвани Хелми и американскиот учесник Виндфилд Бивер потврдија дека таа била туркана и изложена на понижување.
„Беше катастрофа. Кон нас се однесуваа како кон животни“, изјави Хелми, опишувајќи дека притворените биле оставени без храна, вода и лекови. Бивер додаде дека Тунберг била „ужасно третирана“ и „користена за пропаганда“, додека италијанскиот новинар Лоренцо Агостино рече дека таа била „завиткана во израелско знаме и изложена како трофеј“.
Турската ТВ водителка Икбал Гурпинар изјави дека затворските услови биле нечовечки: „Нè оставија гладни три дена, не ни дадоа вода, моравме да пиеме од тоалет. Беше пеколно жешко и сите горевме.“
Според организацијата за човекови права „Адала“, многу од притворените биле принудени да клечат со часови со врзани раце, им биле ускратени лекови и не им бил дозволен пристап до адвокати. Израелското Министерство за надворешни работи ги отфрли овие наводи како „целосни лаги“, нагласувајќи дека сите биле третирани во согласност со законот.
Израел се соочува со меѓународна осуда поради пресретнувањето на околу 40 бродови со хуманитарна помош за Газа, при што биле приведени повеќе од 450 лица. Критичарите истакнуваат дека овој потег ја разоткрива незаконитоста на долгогодишната блокада на Газа, во која живеат 2,3 милиони Палестинци.
Грета Тунберг подоцна им изјави на шведските власти дека во израелскиот притвор била изложена на суров третман, без доволно храна и вода, со појава на осип предизвикан од креветни бубачки и долготрајно седење на тврди површини.
Флотилата, која беше лансирана кон крајот на август, претставуваше најнов меѓународен обид да се пробие израелската блокада и да се достави помош до населението во Газа.
