Ако сеуште не ви беше јасно зошто најнеуспешниот градоначалник Благој Бочварски од редовите на СДСМ стана министер за транспорт и врски, после оваа прес конференција ќе ви се разјасни.
Ако сакаш да си добар и близок функционер до Зоран Заев, мораш да работиш како него. Ако сакаш да си успешен во СДСМ, исто така мораш да работиш по примерот на Зоран Заев.
Системот за цицање на народните пари во семејните фирми кој што го воведе Зоран Заев во Струмица, не е исклучок, туку e правило на функционирање во СДСМ.
Овој модел се применува и во Штип. Семејната фирма на министерот Бочварски кој е доскорeшен градоначалник на општина Штип, добила тендер од општина Штип.
Имено семејната фирма „Де Лукс ДОО“ која е во сопствеништво и управувана од чичкото и таткото на Благој Бочварски, Владимир и Венцислав Бочварски, добила тендер во износ од над еден милион денари од општината, кај што истиот тој Бочварски бил градоначалник, поточно 1,139.000 денари тендер од општината.
Да биде уште посомнително тендерот фирмата го добива еден ден откако Бочварски станува министер, односно на 1-ви септември. Дали тоа значи дека семејната фирма на Бочварски учествувала на целата постапка додека траел тендерот дури тој бил градоначалник, а се чекало само тој да биде избран за министер за да се официјализира како добитник на тендерот неговата семејна фирма?
Нема ли друга фирма во Штип или во Република Македонија која можела да го добие овој тендер, па морало баш семејната фирма на Бочварски да добие милионски тендер во општина Штип?
Постои ли сомнеж парите од тендерите, тендер којшто не е прв да завршувале половина во Струмица, половина кај Бочварски и заради тоа да биде награден за министер во новата Влада?
Дали тоа значи дека треба да продолжи оваа шема на функционирање и во министерството за транспорт и врски?
Почитувани,
Овде постои сериозен сомнеж за злоупотреба на службена должност и судир на интереси воедно, повикуваме Aнтикорупциската комисија и другите надлежни органи да го истражат и санкционираат случајот.
Иако ова нема да се случи бидејќи Зоран Заев го штити криминалот, сепак добро е и Вицепремиерот за борба со корупција Николовски, да не се прави при очи слеп, и уште денес да побара разрешување и санкционирање на неговиот колега министерот за транспорти врски Благој Бочварски, по примерот на Лидија Димова, за што подоцна и треба да одговара.
Почитувани, oва е школски пример за грабеж на народните пари, во спротивно доколку не се преземе ништо, очигледно е дека сите се соучесници и ова им е веќе добро научена шема на функционирање.
Новинарско прашање: Бујар Осани најави средба со Захариева, кој е вашиот став и очекувања во врска со оваа средба?
Одговор: Во однос на ставот по ова прашање ние неколку пати сме го појасниле, тој е ист и непроменлив во однос на таа тема. Во однос на очекувањата сепак да оставиме да видиме кои ќе бидат резултатите од таа нивна средба. Она што можам да го дополнам во контекст на ова прашање е тоа дека воопшто не се искрени ни Османи, ни Никола Димитров, Зоран Заев и сите останати во Владата кон граѓаните и не ги кажуваат сите оние работи кои се разговараат, така да сметам дека треба да бидат барем еднаш искрени кон граѓаните, да излезат и да кажат се она што е разговарано на тема догвоор со нашиот источен сосед Бугарија, за да граѓаните не бидат манипулирани. Не е фер за граѓаните да дознаваат од бугарските политичари и медиуми што се разговара помеѓу Зоран Заев, Османи и Никола Димитров и претставниците од нашиот источен сосед.
