Екипата на МЗТ Скопје Аеродром е новиот стар шампион во Првата македонска кошаркарска лига. Во четвртиот натпревар од финалната серија, „металците“ славеа убедливо со 77:53 против ТФТ во салата „Кале“, со што триумфираа со 3:1 во серијата и ја освоија својата 12-та шампионска титула во историјата на клубот.
Избраниците на тренерот на МЗТ ја започнаа средбата силно, стекнувајќи двоцифрена предност уште во првата четвртина (17:6). Доминацијата продолжи и во вториот период, кога предноста достигна дури +24 (37:13), а на полувремето МЗТ водеше со 44:25.
ТФТ успеа кратко да се врати во третиот период, намалувајќи на само -10 (50:40), но тоа беше максимумот за тимот од Тафталиџе. Во последната четвртина, МЗТ повторно ја крена агресивноста, ја врати високата предност и не дозволи натпреварот да добие неизвесна завршница.
Со оваа победа, МЗТ Скопје потврди дека останува најуспешниот кошаркарски колектив во поновата историја на македонската кошарка и ја продолжи својата доминација на домашната сцена.
