Skip to main content
Македонија

Јаневска од „Кој е следен?“: Одговорност, транспарентност и спречување на идни трагедии

27/03/2025  23:33

Милена Јаневска од граѓанското движење „Кој е следен?“ во емисијата „Аргумент плус“ на ТВ 24 изјави дека нивната иницијатива е насочена кон барање одговорност, зголемена транспарентност и подобрување на безбедносните механизми, со цел да се спречат трагедии како оние што ја потресоа Македонија во изминатите години.

„Нашите барања се поделени во две групи – првата се однесува на одговорноста, која ја препуштаме на истрагата за да се утврди кривична вина, но моралната одговорност треба да ја понесат сите инволвирани. Втората група е поврзана со безбедноста и превенцијата – бараме транспарентност во сите процеси, дигитална платформа ‘Е-инспекторат’ каде што ќе бидат достапни сите инспекциски надзори, како и централен број каде што граѓаните ќе можат да пријават нерегуларности“, истакна Јаневска.

Таа додаде дека движењето не е поврзано со ниту една политичка партија, а нивната цел е да извршат јавен притисок за вистински промени. Според неа, разочарувачки е што пратениците во време на криза си заминале на одмор, додека граѓаните бараат одговори.