Секоја зима настинката и грипот се најчестите причини за здравствени проблеми, но иако симптомите се слични, постојат важни разлики кои може да ви помогнат да препознаете со што точно се соочувате.
1. Кога почнуваат првите симптоми?
Првите знаци на настинка се појавуваат ден или два по контакт со вирусот и најчесто започнуваат со чешање и воспаление на грлото, кое постепено се влошува.
Грипот, пак, настапува нагло и брзо – во рок од неколку часа може да почувствувате дека целото тело ве боли, проследено со треска и слабост.
2. Кои се најчестите симптоми?
Настинката започнува со болка во грлото и течење на носот. Важно е да се знае дека проблемите со носот се засилуваат откако ќе престане воспалението на грлото. Секретот станува погуст и пожолт, а носот останува затнат, со подобрување по петтиот ден.
Грипот, од друга страна, ретко предизвикува промени во носниот секрет, но симптомите како сува, непродуктивна кашлица траат подолго.
3. Колкава температура значи грип, а колкава настинка?
Настинката може да предизвика блага температура и чувство на замор, но телото не е значително исцрпено.
Грипот, меѓутоа, може да доведе до покачување на температурата до 40°C, што често резултира со силна изнемоштеност и принудно мирување.
4. Кога треба да се остане во кревет?
При настинка, симптомите може да бидат благи и во повеќето случаи не бараат лежење, а лицето може да функционира нормално.
Грипот, сепак, предизвикува висока температура, болки во мускулите и зглобовите, губење на апетит и чувство на силна исцрпеност, што го прави одморот неопходен.
5. Колку долго траат настинката и грипот?
Настинката најчесто достигнува врв за два до три дена, а симптомите исчезнуваат по една недела. Целосното закрепнување трае три до четири недели.
Грипот, пак, го исцрпува телото значително повеќе – иако симптомите исчезнуваат за околу десет дена, заморот и слабоста може да траат со недели, па дури и месеци. Во некои случаи, грипот може да предизвика компликации како воспаление на белите дробови.
Како да се заштитите?
Најдобрата заштита е јакнење на имунитетот, со внесување на витамин Ц, здрава исхрана, доволно течности и одмор. Доколку имате висока температура, силна слабост и отежнато дишење, најдобро е да се консултирате со лекар.
