Божиќната приказна на Нетфликс насловена „Тој Божиќ“ (That Christmas), се чини, воодушеви многу гледачи ширум светот, терајќи ги и да заплачат на овој цртан филм.
Тој, имено, се заснова на божиќната трилогија на книгите за деца „Тој Божиќ и други приказни“ (That Christmas and Other Stories), од Ричард Кертис – режисер и сценарист на легендарните филмови „Всушност љубов“ (Love Actually), „Дневникот на Бриџит Џонс“ (Bridget Jones’s Diary) и „Четири венчавки и погреб“ (Four Weddings and a Funeral).
Заплетот на филмот ги следи жителите на измислениот град Велингтон-на-Море кои се подготвуваат за Божиќ, но претстојната снежна бура се заканува да ѝ стави крај на прославата токму на Бадник… Улогата на Дедо Мраз ја презеде Брајан Кокс, а гласот на другите ликови ги позајмуваат Фиона Шо, Џоди Витакер и Бил Нај.
„Филм што ќе стане божиќна традиција“ – се истакнува во една рецензија на „Ротен томатос“ (Rotten Tomatoes).
На оваа платформа го препорачуваат 66 отсто од критичарите и 73 отсто од гледачите. На ИМДБ, пак, филмот има оценка од 6,8 / 10.
„Прекрасни приказни, вешто вткаени во епска божиќна приказна којашто ќе ги воодушеви децата од почетокот до крајот. Ја расплака мојата сопруга (неколкупати) и ме натера да го гледам целиот цртан филм“, напиша еден од гледачите.
Се чини, „Тој Божиќ“, којшто веќе е достапен на Нетфликс – е идеален цртан за семејно гледање. Има само една забелешка: Ќе ви требаат марамчиња за оваа емотивна божиќна приказна.
