Нов земјотрес со јачина од 6,1 степени по Рихтер го погоди јужниот дел на Панама синоќа, а според првичните информации, нема извештаи за жртви или штети.
Геолошкиот завод на САД (USGS) објави дека потресот е регистриран околу 18:20 часот по локално време на длабочина од 10 километри, со епицентар 18 километри западно од градот Рио Гранде, пишува АП .
Серија земјотреси на југот од земјата
Новиот потрес се случи откако два силни земјотреси, со јачина од 7,7 и 6,6 степени, го погодија јужниот дел на Панама во петокот попладне, по што следеа низа последователни потреси. Првиот земјотрес имаше епицентар во покраината Херера, на длабочина од десет километри, а беше почувствуван и во соседна Колумбија. Потресите предизвикаа евакуација на бројни згради, а некои жители ја поминаа ноќта на отворено.
Панамските власти прогласија вонредна состојба во саботата. 27 лица беа повредени, а штети беа регистрирани во сите десет провинции во земјата и во две области на домородните заедници. Според податоците на цивилната заштита во тоа време, оштетени беа околу 420 куќи, приближно исто толку училишта, седум хотели, најмалку 13 цркви и девет мостови. Во тоа време, властите не пријавија смртни случаи поврзани со земјотресот.
Централните провинции Верагуас, Херера, Кокле и Лос Сантос беа особено тешко погодени. Зградите се урнаа на некои места, а лизгањата на земјиштето и оштетените патишта оставија некои заедници отсечени. На островот Исла Кањас во Тихиот Океан, околу 300 луѓе беа евакуирани поради зголемувањето на нивото на морето и силните бранови.
