Ураганот „Симон“ го погоди мексиканскиот брег на Пацификот како ураган од категорија 3, носејќи силни ветрови и обилни дождови. Центарот на ураганот остана над морето, но неговите најсилни ветрови и дождови ги погодија населените области помеѓу планинскиот венец Сиера Мадре и Тихиот Океан, објави АП .
Ураганот се движеше паралелно со брегот, приближувајќи се кон популарниот туристички град Пуерто Ваљарта. Според американскиот Национален центар за урагани (NHC), брзината на ветерот ослабе синоќа на 185 километри на час, но ураганот сè уште претставува голема опасност.
Областа околу Пуерто Ваљарта, популарен туристички град на мексиканскиот пацифички брег во државата Халиско, е особено ранлива. Многу жители живеат во ридовите над туристичките одморалишта, а нивните домови можеби нема да можат да издржат силни налети на ветер.
„Очекуваме катастрофални последици“
Центарот на ураганот синоќа се наоѓаше околу 75 километри јужно од Кабо Кориентес, ’рт на мексиканскиот пацифички брег, недалеку од популарниот туристички град Пуерто Ваљарта. Ураганот се движеше кон северозапад со брзина од околу седум километри на час.
Филип Папен од Националниот центар за урагани на САД предупреди дека Кабо Кориентес, на западниот крај од копното Мексико, би можел да биде директно погоден. Областа се наоѓа на јужниот крај од големиот залив Баија де Бандерас, кој го вклучува и Пуерто Ваљарта.
