Грејната сезона во Скопје официјално започнува на 15 октомври, но парното греење може да биде пуштено и порано доколку временските услови го наложат тоа, информираат од ЕСМ Снабдување со топлина.
Од компанијата упатуваат апел до сите потрошувачи приклучени на системот за централно греење во главниот град, со кој управува АД ЕСМ, навремено да ги завршат неопходните подготовки за претстојната грејна сезона.
Оттаму потсетуваат дека редовното одржување на внатрешните инсталации за греење во домовите е обврска на самите потрошувачи. Секоја интервенција извршена на инсталациите треба да биде пријавена во Центарот за грижа на потрошувачи, со цел да се обезбеди правилно и непречено функционирање на системот.
Посебен апел се упатува до заедниците на сопственици на станбените згради, кои треба да обезбедат непречен пристап на овластените службени лица до топлинските потстаници.
„За правилно функционирање на системот, неопходно е да се обезбеди пристап на службените лица до топлинските потстаници, како и редовно електрично напојување на потстаниците. Апелираме до заедниците на сопственици навремено да ги подмират сметките за електрична енергија за топлинските потстаници и да проверат дали електричните инсталации се функционални“, посочуваат од ЕСМ Снабдување со топлина.
Според најавите, официјалниот почеток на грејната сезона е предвиден за 15 октомври. Сепак, доколку средната температура прогнозирана за наредниот ден изнесува 12 Целзиусови степени или помалку, постои можност централното греење да биде активирано и пред предвидениот датум.
Од ЕСМ нагласуваат дека навремената подготовка на инсталациите и исполнувањето на обврските од страна на потрошувачите и станбените заедници се важни предуслови за непречен почеток на грејната сезона.
