Сообраќајна незгода се случи денеска на булеварот „Св. Кирил и Методиј“, во близина на зградата на поранешна „Нова Македонија“ во центарот на Скопје.
Според првичните информации, во несреќата е повреден доставувач кој се движел со мотоцикл.
На местото на сообраќајката можеше да се забележи паднат и оштетен мотоцикл за достава, како и расфрлани делови на коловозот. Во непосредна близина бил запрен и автомобил, но засега нема официјални информации за точните околности под кои дошло до незгодата.
На местото пристигна полиција, која го обезбедуваше просторот и го регулираше сообраќајот. Поради незгодата, движењето на возилата на овој дел од булеварот се одвиваше отежнато.
Засега нема официјални информации за степенот на повредите на доставувачот.
Повеќе детали за причините и околностите на сообраќајната незгода се очекуваат по завршувањето на полицискиот увид.
