Ретко каде во Скопје на едно место може да се избира меѓу свежо суши, такоси, бургери, гиро, пица, фокача, ќебапи, палачинки и омилени десерти. Токму оваа богата комбинација на вкусови ја носи второто издание на AERO Street Food Festival, кое од 4 до 8 септември ќе се одржува во паркот „Авионче“.
Оваа година храната е во главниот фокус на фестивалот. Дваесет различни гастрономски концепти ќе понудат вкусови инспирирани од светските кујни – од скопски класици до современи рецепти за улична храна.
Годинава учествуваат: Burgerslut, Mustacos, Loras Sushi, Fat Kitchen, Jojo’s BBQ, Oljo’s, Noa Gyradiko, Scoop, Bistro 64, Smash Burger, Sorelle, 11: Eleven, „Сутлијаш бар“, „15 за 12“, „Трансилваниско трдло“, Pizza Vice City, „Дестан“, Milkey, Sweet Look и „Жешко компирче“.
Посетителите ги очекува богата трпеза со бургери, такоси, суши, гиро, паста, фокача, печени компири, сладолед, сутлијаш и многу други солени и слатки задоволства. Идејата е секој да пронајде нешто по свој вкус, да споделува порции со друштвото и да испробува нови градски вкусови.
За добрата енергија во текот на сите пет вечери ќе се погрижат домашни бендови и диџеи. На сцената ќе настапат South Park, Ringtones, Dopamine, Marbel и Acoustic Division, а за забавата пред и по концертите ќе бидат задолжени Милан Серафимов, Александар Јорданов, „Јанко петел јаваше“, DJ Marko, DJ Vaso, DJ Rizinski, диџеите од Fluere, DJ Guardian, DJ Ficho и Sure Shotz.
Покрај храната и музиката, секоја вечер ќе биде исполнета и со забавни содржини – натпревари во брзо јадење, квизови и предизвици со публиката, под водство на Бомбакис.
Фестивалот ќе биде отворен секој ден од 17:30 до 00:30 часот. Спонзор на настанот е Општина Аеродром, а покровител е Град Скопје. Зад организацијата стојат Lions in Move и Café Mambo.
