САД штотуку постигнаа договор со Венецуела за најголемиот нафтен договор во светската историја, објави американскиот претседател Доналд Трамп на својата социјална мрежа Truth Social во петокот.
„По мои упатства, државниот секретар Марко Рубио и секретарот за војна Пит Хегсет , во тесна соработка со високо почитуваната привремена претседателка на Венецуела , Делси Родригез , и преку партнерства со приватниот сектор, обезбедија мнозинска контрола на САД врз повеќе од 65 милијарди барели докажани резерви на нафта во Венецуела, без никакви трошоци за американските даночни обврзници“, напиша тој.
Трамп додаде дека оваа „историска трансакција повеќе од двојно ги зголемува резервите на нафта во САД, значително го зголемува нашето снабдување со нафта и значително ќе ги намали цените на горивата за сите Американци на долг рок, а воедно ќе ѝ помогне на Венецуела да продолжи по својот пат кон огромен успех и голем просперитет“.
„Оваа трансакција значително ќе ги зајакне веќе подобрените односи меѓу Венецуела и САД!“, рече Трамп.
Венецуела го потврди „историскиот“ договор за нафта
Привремената претседателка Делси Родригез потврди дека Венецуела потпишала „историски“ договор за нафта со САД, изразувајќи „длабока благодарност“ до американскиот претседател Доналд Трамп и владата на САД, речиси девет месеци откако американската војска го зароби претседателот Николас Мадуро.
„Венецуела објавува историски договор со владата на Соединетите Американски Држави, кој ќе има значително влијание врз закрепнувањето на нашата нација“, рече Родригез во соопштение објавено на социјалните мрежи.
Според неа, договорот ќе овозможи значително зголемување на производството на нафта со учество на приватни оператори и, како што рече, вклучува „развој на 17 стратешки полиња со докажан потенцијал од 65 милијарди барели нафта, инвестиција од повеќе од 100 милијарди долари и повеќе од 209 милијарди долари даночни приходи за државата“.
Ова, пак, додаде таа, ќе овозможи „значаен прилив на инвестиции насочени кон обновување и изградба на стратешка инфраструктура за развој на нашата јаглеводородна индустрија“. Родригез рече дека со потпишувањето на овој договор, Венецуела влегува во „нова ера на закрепнување, раст, безбедност на производството и просперитет за својот народ“.
„Нашата цел е да ја консолидираме нашата позиција како енергетска суперсила со ставање на нашите огромни резерви во служба на националниот развој, создавањето работни места, зголемувањето на приходите на нашите работници и благосостојбата на нашиот народ“, се вели во соопштението за медиумите.
Венецуела има најголеми докажани резерви на нафта во светот, со повеќе од 303 милијарди барели. Сепак, нејзиното производство останува ограничено.
Во исто време, стратешките резерви на САД се на најниско ниво од ноември 1982 година, според податоците од американската Администрација за енергетски информации (EIA).
Вашингтон се обврза постепено да ослободи 172 милиони барели од вкупно 415 милиони што ги имаа овие резерви на крајот на февруари, со цел да се ублажат прекините во снабдувањето и порастот на цените на суровата нафта поврзани со тековната војна на Блискиот Исток.
