Пациент од Скопје на 76-годишна возраст, кај кого е потврден вирусот Западен Нил, се наоѓа во критична, животозагрозувачка состојба и е приклучен на респиратор на Клиниката за инфективни болести.
Кај пациентот се развила тешка форма на болеста со енцефалитис, односно воспаление на мозокот, поради што е сместен на интензивна нега.
Според епидемиолошките податоци, 76-годишниот скопјанец во периодот пред појавата на симптомите не патувал надвор од земјава. Тоа укажува дека инфекцијата е стекната локално, преку убод од заразен комарец.
„За жал, 76-годишниот пациент има тешка клиничка слика и се наоѓа во Одделот за интензивна нега. Тој е поставен на респираторна поддршка бидејќи неговата состојба е критична. За разлика од него, останатите хоспитализирани пациенти се стабилни и се префрлени на лекување во Одделот за невроинфекции“, изјави д-р Фадил Цана, директор на Клиниката за инфективни болести.
Со последниот потврден случај, бројот на официјално регистрирани заболени од западно-нилска треска во земјава достигна осум.
Значаен дел од регистрираните пациенти се лица на повозрасна возраст, а кај повеќе од нив нема податок за неодамнешно патување во странство. Ова дополнително укажува на локална циркулација на вирусот.
Најголем број од досега евидентираните случаи се поврзуваат со Скопје и Велес.
Западно-нилскиот вирус најчесто се пренесува преку убод од заразен комарец. Кај најголем дел од заразените инфекцијата може да помине без симптоми или со полесна клиничка слика, но кај дел од пациентите, особено кај повозрасните и лицата со нарушено здравје, може да предизвика сериозни невролошки компликации.
Здравствените служби апелираат граѓаните да применуваат мерки за заштита од комарци, особено во периодите од денот кога тие се најактивни. Посебна внимателност се препорачува за повозрасните лица и хронично болните.
