Три лица загинаа, а десетици се повредени откако камион-монструм се удри во толпа луѓе во јужна Колумбија.
Полицијата верува дека сопирачките на возилото откажале за време на настанот во градот Попајан во покраината Каука вчера. Снимките од инцидентот покажуваат како луѓето бегаат додека возилото пробива низ бариера и се удира во толпата, пред да застане откако ќе удри во електричен столб.
Властите соопштија дека најмалку 38 лица се повредени. Според весникот „Ел Еспектадор“, 10-годишно девојче починало на местото на настанот.
Шефот на полицијата во Попајан, полковник Хулијан Кастањеда, за „Ел Тиемпо“ изјави дека се чини дека возилото имало технички дефект. „Возилото забрзало, не можело да закочи, а возачот е во стабилна состојба“, рече тој.
Градоначалникот изјави дека ќе биде спроведена темелна истрага. „Овие настани, кои никогаш не требало да се случат, ќе бидат разјаснети со целосна одговорност и транспарентност“, објави Хуан Карлос Муњоз Браво.