Парламентот на Салвадор одобри воведување доживотни казни за малолетници кои извршиле сериозни кривични дела како што се убиство, силување и тероризам.
Мерката е дел од стратегијата на претседателот Наиб Букеле за борба против бандите. Неговата кампања во овој поглед трае веќе четири години и е критикувана од некои организации за човекови права за наводни злосторства против човештвото.
Според усвоените измени, доживотниот затвор станува една од „вонредните казни“ што се применуваат за лица под 18 години.
Реформата се темели на уставните амандмани од 18 март, кои дозволуваат доживотен затвор – претходно забранет со уставот на земјата – за најтешките кривични дела. Пред уставните измени, максималната казна во Ел Салвадор беше 60 години затвор.
Дополнително, парламентот ја продолжи вонредната состојба, која дозволува апсења без судска наредба, за уште 30 дена и е во сила веќе четири години.
