Американскиот министер за финансии Скот Бесент изјави дека САД имаат „доволно пари“ за финансирање на војна против Иран и дека нема да биде потребно зголемување на даноците.
Бесент рече дека Вашингтон има доволно средства за да ги покрие трошоците за војна против Иран од постојните буџетски рамки.
„ Имаме доволно пари за да ја финансираме оваа војна “, рече американскиот секретар за финансии.
Тој додаде дека потенцијалното дополнително барање за буџет на Пентагон, за кое американските медиуми објавуваат дека е пакет вреден околу 200 милијарди долари, нема да биде наменето за директно финансирање на тековните операции, туку за зајакнување на идните воени капацитети.
„ Претседателот Трамп ја обнови војската, како што направи во својот прв мандат, како што прави сега во својот втор, и сака да се осигури дека војската е добро снабдена во иднина “, рече Бесент.
Иако тој не ја потврди бројката од 200 милијарди долари, неговата изјава доаѓа во време кога Пентагон наводно бара дополнителни средства за долгорочна воена подготвеност во услови на војна со Иран.
Сепак, таквото барање веќе наидува на силен отпор во Конгресот. Некои демократи, но и некои републиканци, ја доведуваат во прашање потребата од нови големи трошоци за одбрана, со оглед на тоа што американската војска веќе доби значително зголемување на буџетот минатата година.
