Папата Лав XIV денеска упати силен апел за запирање на „спиралата на насилство“ на Блискиот Исток, по најновата ескалација меѓу Соединетите Американски Држави, Израел и Иран.
Обраќајќи им се на верниците собрани на плоштадот „Свети Петар“ во Ватикан за време на неделната молитва Ангел Господов, поглаварот на Римокатоличката црква предупреди дека светот се соочува со можност од трагедија од огромни размери.
„Соочен со можноста за трагедија од огромни размери, ги повикувам вклучените страни да ја преземат моралната одговорност да ја запрат оваа спирала на насилство пред да доведе до непоправлив раскол“, порача папата.
Тој нагласи дека стабилноста и мирот не можат да се изградат врз закани и употреба на оружје, туку исклучиво преку дијалог и дипломатија.
„Стабилноста и мирот не се градат врз меѓусебни закани или врз оружје, кое сее уништување, страдање и смрт, туку само врз разумен, искрен и одговорен дијалог. Нека дипломатијата ја врати својата улога и нека се промовира доброто на народите“, истакна тој.
Покрај повикот за деескалација на Блискиот Исток, папата Лав XIV апелираше и за „итно враќање на дијалогот“ меѓу Авганистан и Пакистан, каде што во изминатите денови се регистрирани вооружени инциденти и размена на оган.
Со пораката за мир, поглаварот на 1,4 милијарди католици во светот повторно ја нагласи улогата на Црквата како гласник на дијалогот и помирувањето во време на глобални тензии.
