Со часови, експлозии одекнуваат низ Киев откако Русија лансираше балистички ракети врз главниот град на Украина. Една жена и едно дете се повредени во нападите во близина на градот, пишува „Киев Индепендент“ .
Првите експлозии во главниот град на Украина се слушнале околу 4:00 часот наутро по локално време, а нов бран следел околу 4:30 часот наутро. „Непријателот го напаѓа главниот град со балистичко оружје. Останете во засолништата додека не престане опасноста“, изјави Тимур Ткаченко, началник на Градската воена администрација на Киев.
Властите го издадоа првото воздушно предупредување во 3:56 часот наутро, а подоцна беше проширено на целата земја поради полетувањето на руските бомбардери, соопштија воздухопловните сили. Дополнителни експлозии во Киев беа пријавени околу 5:13 часот наутро.
Градоначалникот на Киев, Виталиј Кличко, потврди дека повредените се однесени во болница. „Двајца од повредените – жена и дете – беа однесени од предградијата во болниците во Киев“, објави тој.
Полска подигнува борбени авиони
Како одговор на руските напади, полските воздухопловни сили кренаа борбени авиони во воздух преку ноќ за да го заштитат својот воздушен простор. „Борбени авиони на должност и авион за рано предупредување беа кренати во воздух, а копнените системи за воздушна одбрана и радарите беа ставени на највисоко ниво на тревога“, се вели во соопштението.
