Протераниот син на последниот шах на Иран, Реза Пахлави, го повика американскиот претседател Доналд Трамп да му помогне на иранскиот народ да стави крај на власта во Техеран, порачувајќи дека е „време да се стави крај на Исламската Република“.
Говорејќи на Минхенска безбедносна конференција, Пахлави ги охрабри Иранците во земјата и дијаспората да продолжат со протестите и да изразат поддршка преку синхронизирани скандирања од своите домови, во знак на солидарност со демонстрантите во Германија и на други места.
„До претседателот Трамп… Иранскиот народ ви верува. Помогнете им“, порача Пахлави, кој живее во САД и не се вратил во Иран од Исламската револуција во 1979 година, кога беше соборена монархијата.
Трамп изјави дека промената на владата во Иран би била „најдоброто нешто што може да се случи“ и најави зголемен воен притисок врз Техеран. Протестите во Иран, кои кулминираа во јануари, беа задушени со сила, а бројот на жртви, според опозициски извори, надмина неколку илјади.
Пахлави, кој има 65 години, изрази подготвеност да предводи демократска транзиција. Сепак, иранската опозиција останува поделена, а тој се соочува со критики, вклучително и поради неговата поддршка за Израел и поради тоа што не се дистанцирал од авторитарното владеење на својот татко.
