Повеќе од 1.100 станбени згради во Киев и околината останаа без греење по руски напад врз енергетската инфраструктура, соопшти градоначалникот Виталиј Кличко. Нападот се случува во услови на екстремен студ, при што температурите се движат од минус девет, а се очекува да паднат и до минус 17 степени Целзиусови. Според Кличко, оштетен е градскиот систем за централно греење, што сериозно ги погодува жителите на украинската престолнина. Претседателот Володимир Зеленски изјави дека Русија го прекршила договореното енергетско примирје и извршила масовен напад врз цивилна инфраструктура, и покрај апелите од американската страна да се воздржи од напади врз енергетски објекти.
Украинскиот министер за енергетика Денис Шмихал оцени дека нападите биле насочени исклучиво кон цивилни цели и ги опиша како обид за „зимски геноцид“. Во нападот, Русија користела ракети и дронови, а украинската противвоздушна одбрана соборила 450 од вкупно 521 лансиран проектил. Во меѓувреме, утре и в четврток во Абу Даби продолжуваат мировните разговори меѓу Украина и Русија, со посредство на САД, на кои ќе присуствува и американскиот специјален претставник Стив Виткоф.
