Володимир Зеленски остро ги критикуваше европските лидери во Давос, обвинувајќи ги дека размислуваат само за Гренланд и чекаат насоки од Доналд Трамп, наместо самите да преземат мерки за Украина и другите геополитички кризи. Повикот на украинскиот претседател за акција, испратен до некои од клучните сојузници на Киев, дојде на крајот од неделата обележана со дипломатска драма на Светскиот економски форум, пишува „Гардијан“ .
Критика за европската неактивност
Во својот говор на Светскиот економски форум вчера, тој рече дека Европа зборува премногу, а дејствува премалку, споредувајќи го европското однесување со комедијата „Денот на мрмотот“, односно бесконечното повторување на истите дискусии без конкретен напредок.
„Само минатата година тука во Давос, го завршив мојот говор со зборовите: „Европа мора да знае како да се одбрани“ – помина една година и ништо не се промени“, рече Зеленски, додавајќи дека европските политичари повторно се чини дека чекаат некој друг да ги реши работите наместо нив.
Проблемот со „Гренландскиот пат“
Тој конкретно се осврна на кризата со Гренланд, која ги засени дел од дискусиите на СЕФ во последните денови и дополнително ја зголеми нервозата кај европските сојузници по пораките на Трамп за анексијата. Зеленски рече дека е очигледно дека многу лидери се „заглавени“ во врска со ова прашање, не знаејќи како да одговорат.
„Европа останува во „режим на Гренланд“: можеби некој некаде ќе направи нешто“, рече тој, алудирајќи на она што го оцени како навика на Европа да зависи од американските потези.
Потоа тој отворено ја критикуваше атмосферата во која Европа се надева дека проблемот ќе помине сам по себе. „Сите го насочија вниманието кон Гренланд и јасно е дека повеќето лидери не се сигурни што да прават во врска со тоа. Се чини дека сите само чекаат Америка да се смири по ова прашање, надевајќи се дека ќе помине. Но, што ако не помине: што потоа?“, праша Зеленски.
Тој предупреди дека заканите за Европа се егзистенцијални не само за Украина, туку и за НАТО. „Заканите за Европа се егзистенцијални за НАТО“, рече тој, повикувајќи го континентот да создаде „обединета вооружена сила“ што би можела да го одбрани.
Тој особено се осврна на потпирањето на претпоставката дека САД секогаш ќе реагираат. „Денес, Европа се потпира само на верувањето дека ако има опасност, НАТО ќе одговори. Но, никој всушност не го видел алијансата во акција. Ако Путин одлучи да ја окупира Литванија или да ја нападне Полска, кој ќе одговори? Во моментов, НАТО постои благодарение на верувањето дека САД ќе дејствуваат… но што ако не го сторат тоа?“, рече Зеленски.
