Пензионерите од Штип денеска најавија протест на 1 декември пред Уставниот суд во Скопје, со цел да се изборнат за продолжување на линеарното усогласување на пензиите. На прес-конференцијата побараа масовна поддршка од пензионери од целата земја.
Зоран Трајков најави дека протестот ќе започне во 11 часот, а Трајче Станојков од Свети Николе додаде дека доколку нема резултати, демонстрациите ќе продолжат на 10 декември. Пензионерите ќе бараат и покачување на К-15, повисока посмртнина, како и воведување пензионерска картичка.
Трајче Митев од Штип истакна дека бараат зголемување на посмртнината од сегашните 35.000 на 50.000 денари и создавање фронт за пензионерска картичка. На собирот присуствуваа пензионери од Штип, Свети Николе, Скопје и Куманово, а Вера Јовановска порача дека ќе продолжат да се борат против дискриминацијата и за линеарно зголемување кое ќе важи за сите.
Пензионерите веќе добија линеарно покачување од 5.000 денари, а во септември им беа исплатени дополнителни 1.000 денари. Ново усогласување во иста висина е најавено за март следната година.
