Двајца навивачи се тешко повредени, а уште десет се полесно повредени при синоќешната тепачка меѓу симпатизерите на Олимпијакос и Панатинаикос во Берлин на завршниот турнир од кошаркарската Евролига.
Баскетњуз го пренесува пишувањето на германските и грчките медиуми кои наведуваат дека во текот на ноќта на неколку локации во Берлин се судриле навивачи на двата грчки клуба. Локалната полиција известува дека во тепачката учествувале околу 70 навивачи, а некои користеле бејзбол палки и шипки.
Германските медиуми јавуваат дека локалната полиција морала да ја повика на помош противпожарната бригада.
Грчките медиуми јавуваат дека во текот на денот во Берлин ќе пристигнат околу 5.000 навивачи на Панатинаикос.
Кошаркарите на Олимпијакос денеска од 17 часот ќе играат против Фенербахче во мечот за третото место во Ф4 Евролигата, додека финалето меѓу Реал и Панатинаикос е закажано за три часа подоцна.
