Ирачкиот парламент усвои закон со кој се криминализираат хомосексуалните односи и трансродовите лица, со казни кои можат да изнесуваат и до 15 години затвор.
Законот е усвоен по првата верзија која вклучувала и смртна казна.
Веднаш реагираше меѓународната невладина организација Амнести интернешенел (Амнести интернешенел), која го критикуваше „кршењето на основните човекови права“, оценувајќи дека денеска усвоените амандмани „се закануваат на Ирачаните кои и онака секојдневно се малтретирани“.
Тие амандмани, со кои се менува законот против проституција од 1988 година, биле усвоени на седница на која присуствувале 170 пратеници од вкупно 329, се наведува во соопштението на прес-службата на ирачкиот парламент.
Новиот закон предвидува казни од десет до 15 години затвор за хомосексуални односи, како и за размена на сексуални партнери во хетеросексуални односи, се наведува во текстот што го виде агенцијата АФП.
Законот забранува „секоја организација која промовира хомосексуалност во Ирак“, со седумгодишна затворска казна за „промовирање на хомосексуални односи“.
Законот, исто така, забранува „промена на биолошкиот пол врз основа на индивидуални желби или преференции“ и предвидува казна од една до три години затвор за секое лице или лекар кој е вклучен во родовата транзиција.
Слична казна е предвидена за секој маж чие однесување се смета за женско.
Ирачкото општество ја отфрла хомосексуалноста, а малата ЛГБТ+ заедница често е цел на „киднапирање, силување, тортура и убиства“ од вооружени групи кои остануваат неказнети за нивните злосторства, се вели во извештајот на меѓународната невладина организација Хјуман рајтс воч од 2022 година.
