Американскиот претседател Џо Бајден изјави дека САД „во наредните денови“ ќе им се придружат на земјите-партнери во испраќањето хуманитарна помош во Газа со авионско фрлање.
– Во наредните денови ќе им се придружиме на нашите пријатели во операциите за испраќање хуманитарна помош во Газа со авион – рече Бајден во Белата куќа за време на приемот на италијанскиот премиер Ѓорѓa Мелони.
Тој го рече ова еден ден откако најмалку 115 Палестинци беа убиени, а повеќе од 750 повредени, според Министерството за здравство на Газа, во стампедо додека тие брзаа кон камионите со помош и израелските војници отворија оган врз нив.
Израел рече дека многу од загинатите биле згмечени до смрт во стампедото предизвикано од хаосот што настанал кога гладните луѓе се упатиле кон камионите со хуманитарна помош и дека некои од израелските војници пукале кон толпата за која верувале дека се движела кон нив на заканувачки начин.
