Откако техничкиот министер за внатрешни работи Панче Тошковски на социјалните мрежи објави случај за одземено оружје, во кое се вмешани високи полициски службеници, со свој став за 24инфо.мк излезе и дополнителниот заменик министер за внатрешни работи Митко Бојмацалиев.
Според него, Тошковски во својата објава изнесува невистини.
„За случајот со објавениот пост на неговиот Фејсбук профил, во врска со извршената тешка кражба во која е одземена една малокалибарска пушка за спортско стрелаштво, па како што наведува низа лаги и невистини меѓу кои и дека не е поднесена прекршочна пријава против имателот на пушката, ниту кривична пријава против сторителот на кривичното дело, сакам да ја информирам јавноста за следново: Наводите се крајно неточни и измислени од една едноставна причина што против имателот на пушката од страна на СВР Скопје е поднесена соодветна пријава, а исто така и против сторителот на кривичното дело. Токму врз основа на поднесената пријава против сторителот од страна на судија на претходна постапка му е одредена мерка притвор“ вели Бојмацалиев.
Дополнителниот заменик министер го повика Тошковски да се воздржи од шпекулации.
„Апелирам до министерот Тошковски дека е потребно да се воздржи од шпекулации, водење политиканство и обиди за собирање ситни политичкиу поени. Напротив, го повикувам да ги ихрабри и поддржи полициските службеници кои работеа на расветлување на овој кривично правен настан и за само неколку часа успеаја да го откријат сторителот и да ги пронјадат одземените предмети од извршената тешка кражба„ порача Бојмацалиев за 24инфо.мк
