Американскиот Сенат не усвои резолуција со која ќе се замрзне воената помош за Израел доколку Стејт департментот не поднесе извештај во рок од 30 дена за тоа дали Израел ги прекршил човековите права во својата кампања против Хамас во Појасот Газа.
Резолуцијата ја поднесе Берни Сандерс, сенатор од сојузната држава Вермонт, но 72 сенатори гласаа против, наспроти 11 кои го поддржаа предлогот.
-Мораме да обезбедиме американската помош да се користи во согласност со човековите права и нашите сопствени закони, рече сенаторот Сандерс, жалејќи се поради тоа што Сенатот не ги разгледа мерките кои влијаат на ситуацијата на палестинските цивили во Газа.
Резолуцијата на Сандерс беше поднесена според Законот за надворешна помош, што му дозволува на Конгресот да му нареди на Стејт департментот да објави извештај за човековите права и други информации за која било земја на која САД и даваат воена помош, пренесуваат британските медиуми.
Доколку резолуцијата беше усвоена, Стејт департментот ќе требаше да поднесе извештај до Конгресот во рок од 30 дена.
По добивањето на извештајот, Конгресот може да разгледа дополнителна резолуција со која се предлагаат промени во безбедносната помош за Израел.
И покрај огромниот пораз на оваа резолуција во Сенатот, постои зголемена загриженост, особено кај левоориентираните гласачи на американскиот претседател Џо Бајден, за испораката на американско оружје за Израел, и покрај големиот број палестински жртви во Појасот Газа, наведуваат британските медиуми.
Белата куќа соопшти дека се противи на резолуцијата.
Сенаторите кои гласаа против велат дека испраќа погрешна порака во време кога Израел вели дека преминува кон попрецизно лоцирање на целите во Појасот Газа.
-Оваа резолуција не само што е неоснована, туку и опасна. Таа испраќа апсолутно погрешен сигнал во погрешно време, прокоментира републиканскиот сенатор Линдзи Греам.
САД секоја година му даваат на Израел воена помош од 3,8 милијарди долари, вклучувајќи борбени авиони и бомби кои можат да ги уништат тунелите на Хамас, додека Бајден побара од Конгресот да одобри дополнителни 14 милијарди долари помош за Тел Авив.
