Сигурно сте забележале како се чувствувате полесно и подобро откако некој добро ќе ве изнасмее. Но, науката покажа дека смеењето не само што помага да се опуштите, туку прави и многу позитивни работи за нашето здравје.
Според една студија објавена во International Journal of Obesity, смеењето согорува и калории. Поточно, 10 до 40 калории ако се смеете 10 до 15 минути дневно. Тоа е приближно количеството на калории што го внесувате ако јадете мало чоколадо.
Истражувачите дошле до своите заклучоци со мерење на отчукувањата на срцето и потрошувачката на енергија (метаболичка стапка) кај 100 волонтери кои гледале хумористични клипови. „Откривме дека кога луѓето се смееја, зголемувањето беше околу 20 проценти над просечната стапка на метаболизам во мирување“, рече др. Мачеј Бучовски од Универзитетот Вандербилт во Нешвил.
Исто така, некои научници веруваат дека смеењето може да има слично влијание врз вашите хормони како вежбањето. Исто така, се покажа дека ги дава истите резултати како вежбањето кога станува збор за здравјето на срцето. „Кога се смеете 15 минути, зголемувањето на дијаметарот на крвните садови е слично на она што се случува кога трчате или правите некоја друга кардио активност“, објаснува кардиологот Мајкл Милер за CNN.
Понатаму, смеењето поттикнува поголем внес на кислород, што може да биде корисно за нашите внатрешни органи. Дефинитивно има одредена вистина во изреката „Смеата е најдобар лек“, бидејќи може да го подобри здравјето на имунолошкиот систем, да биде средство за ублажување на болката и да се бори против хормонот на стрес, кортизол, кој може да предизвика разни воспаленија.
Иако не треба да се потпирате само на смеата за да согорувате калории, да ги регулирате хормоните или да го подобрите кардиоваскуларното здравје, неговите придобивки за нашето тело се повеќе од очигледни.
