Фудбалерите на актуелниот шпански првак Барселона со гол од пенал во судиското продолжение, 93 минута победија на гостувањето кај Лас Палмас (2:1) во последниот меч од 19. коло во Ла-лигата.
Мизеријата на Каталонците продолжи и на стартот на новата година откако нивниот поранешен фудбалер Мунир Ел Хадади во 12. минута донесе водство од 1:0 за домашниот тим. На стартот на второто полувреме избраниците на Чави Хернандез успеаја да се вратат во игра и во 56. минута да израмнат на 1:1 преку Феран Торес.
Барселона стигнаа до победа откако Гундоган премногу лесно падна во противничкиот шеснаесетник по што неговиот тим доби пенал, а Сингравен црвен картон. Пеналот успешно го реализираше германскиот репрезентативец за триумф од 2:1.