Вчера, Шведска ја забележа најстудената јануарска ноќ во последните 25 години, со отчитување од -43,6 Целзиусови степени на северот на земјата.
Шведска е покриена со снег, а слична е ситуацијата и во соседна Финска.
Екстремно ниските температури, снегот и силните ветрови го попречија транспортот во нордискиот регион, со затворени неколку мостови, а прекинати се некои железнички и фериботски услуги. Неколку училишта во Скандинавија беа затворени.
Полицијата во поголемиот дел од Данска ги повика возачите да избегнуваат непотребни патувања бидејќи ветерот и снегот ги погодуваат северните и западните делови на земјата.
Бран студен воздух од Сибир и арктичкиот регион ја зафати и западна Русија, а температурите во Москва и другите области паднаа на -30 Целзиусови степени, што е значително под просечната температура за почетокот на јануари.