Министерот за внатрешни работи Оливер Спасовски денеска упати повик да престане со како што тој рече, политиканството околу случајот со двојното убиство и ги повика сите што имаат какви било сознанија, да ги предадат во надлежните институции.
„Политиканството во вакви случаи на убиства уште еднаш ги убива жртвите. Не посакувам да се впуштаме сите во политиканство, туку да се работи сериозно, до крај да се проширува истрагата, да се откријат сите факти и докази. Се испитуваат и многу видови комуникации кои биле изминатиот период, и со осомничените и со лица надвор од оваа група. Тоа е важно за истрагата за тие радикални структури да бидат целосно разбиени. Сите оние кои имаат докази како што викаат – веднаш да ги предадат на истражните органи. Доколку не се предадат – тоа е кривично дело“ порача Спасовски.
