Во одговор на новинарско прашање, претседателот на Владата Димитар Ковачевски денеска порача дека актуелната влада покажала како се зголемуваат пензиите на системски начин.
„Донесовме решение за зголемување на пензиите, два пати во годината, согласно растот на просечната плата и согласно растот на трошоците за живот. Имаме најголемо зголемување на пензиите во историјата на државата, во изминатите година и половина, од 24%. Само за споредба, ние имаме 50% зголемена минимална пензија и 50% зголемена просечна пензија во државата. Не е начин пред избори на пензионерите да им се ветува еднократно зголемување, туку ова е начинот каде во време на најголема криза се зголемени пензиите за толкав процент. А за идната година, во Буџетот за 2024 година, за пензиите се предвидени дополнителни 100 милиони евра повеќе од оваа година, со цел понатамошно нивно зголемување согласно Методологијата”, констатираше премиерот Ковачевски.
Тој додаде дека антикризните мерки се во финална фаза, со нив се опфатени околу 400.000 граѓани и тука спаѓаат пензионерите кои се со пониски пензии.
„Утре, на Влада, доколку се биде финализирано, мерките ќе бидат донесени и ќе следува прес-конфренција на којашто ќе бидат објавени”, соопшти премиерот Ковачевски.
