Израелската војска соопшти дека јеменската милиција Хути запленила товарен брод во јужниот дел на Црвеното Море додека пловел од Турција кон Индија, нарекувајќи го „многу сериозен инцидент на глобално ниво“.
„Бродот ја напушти Турција на пат кон Индија, превезувајќи цивили од различни националности, не вклучувајќи ги Израелците. Тоа не е израелски брод“, се вели во објавата на израелската војска на социјалните мрежи.
Претходните извештаи покажаа дека Хутите киднапирале израелски брод со име „Галакси Лидер“ во Црвеното Море со 22 лица.
Бродот под знамето на Бахамите е регистриран на британска компанија, која е делумно во сопственост на израелскиот тајкун Абрахам Рами Унгар.
Бродот бил изнајмен на јапонска компанија во времето на киднапирањето.
Во соопштението, канцеларијата на израелскиот премиер Бенјамин Нетанјаху го обвини Иран за инцидентот, објави „Тајмс оф Израел“.
Се наведува дека на бродот имало екипаж од 25 членови од Украина, Бугарија, Филипините и Мексико, а меѓу нив немало Израелци.
„Ова е уште еден чин на ирански тероризам кој изразува чекор напред во иранската агресија врз граѓаните на слободниот свет и создава меѓународни импликации кога станува збор за безбедноста на глобалните бродски рути“, се вели во соопштението.
Претходно во неделата, Јахја Сареа, портпарол на Хутите поддржани од Иран, рече дека групата ќе ги таргетира сите бродови во сопственост или управувани од израелски компании или што пловат под израелско знаме, според каналот Телеграм на групата.
Сареа ги повика сите земји да ги повлечат своите граѓани кои работат на екипажот на таквите бродови.
Во вторникот, лидерот на Хутите предупреди дека неговите сили ќе извршат дополнителни напади врз Израел и дека би можеле да ги таргетираат израелските бродови во Црвеното Море и теснецот Баб ал-Мандеб.
– Нашите очи се отворени за постојано следење и потрага по кој било израелски брод во Црвеното Море, особено во Баб ал-Мандаб и во близина на регионалните води на Јемен – рече Абдулмалик ал-Хути во говорот.
Хутите извршија неколку ракетни и беспилотни напади врз Израел овој месец, нагласувајќи го ризикот војната меѓу Израел и палестинската милитантна група Хамас да се прошири на поширокиот Блиски Исток.
