Кинескиот претседател Си Џинпинг предложи Кина да испрати нови панди во САД, нарекувајќи ги „амбасадори на пријателството меѓу кинескиот и американскиот народ“.
„Слушнав дека зоолошката градина во Сан Диего и луѓето од Калифорнија би биле многу среќни да ги вратат пандите“, им рекол Си на американските бизнис лидери за време на вчерашниот говор во Сан Франциско.
Тој истакна дека Кина е подготвена да ја продолжи соработката со САД за зачувување на пандите и прави се за да ги исполни желбите на жителите на Калифорнија со цел да ги продлабочат пријателските врски меѓу двете нации.
Си го изјави ова неколку часа по одржувањето на опсежни разговори со американскиот претседател Џозеф Бајден, за време на кои двајцата лидери направија позитивни чекори во стабилизирањето на проблематичните односи меѓу двете најголеми светски економии.
Кина им позајмува панди на земјите ширум светот како амбасадори на пријателството од Пекинг, во програма која често се нарекува „панда дипломатија“.
Во текот на изминатата деценија, Си одлучи да позајми панди на голем број европски земји, вклучувајќи ги Германија, Холандија, Данска и Финска.
Кина минатата година испрати пар панди во Катар.
Тоа беше првата земја од Блискиот Исток на која и беа позајмени пандите.
Спротивно на тоа, Кина не позајми ниту една панда на САД во последните две децении.
Пандите служат како неофицијален барометар на кинеско-американските односи од 1972 година, кога Пекинг донираше пар на Националната зоолошка градина Смитсонијан во Вашингтон, по историското патување на американскиот претседател Ричард Никсон во Кина.
На почетокот на овој месец, трите последни преостанати панди во Националната зоолошка градина Смитсонијан, Тиан Тиан, Меи Ксијанг и нивното младенче, Ксијао Чи Џи, беа вратени во Кина, ставајќи крај на повеќе од 50 години кинески панди во зоолошката градина.
Сега Зоолошката градина Атланта е единствената американска зоолошка градина која има панди од Кина.
Договорот за четирите панди во Атланта истекува следната година, без најава за продолжување.
Кинескиот претседател не објасни каде би можеле да бидат испратени идните кинески панди, но посочи дека Калифорнија ќе биде најверојатната дестинација.
