САД побараа објаснување за коментарите на израелскиот премиер Бенјамин Нетанјаху дека по војната против терористичката група Хамас, Израел ќе ја преземе безбедносната одговорност за Појасот Газа на неодредено време.
Нетанјаху навести дека Израел ќе се спротивстави на враќањето на палестинските власти во Појасот Газа по војната, пишува „Тајмс оф Израел“.
Израел ја осудува палестинската управа, велејќи дека ги учи децата да сакаат да се елиминира Израел, да го поддржуваат тероризмот и конкретно ги обвинува што не го осудиле масакрот на Хамас на 7 октомври, што ја предизвика тековната војна.
Нетанјаху во петокот рече дека израелските одбранбени сили ќе продолжат да го контролираат Појасот Газа по завршувањето на војната и нема да се потпираат на меѓународните сили за следење на безбедноста долж границата.
Минатата недела Нетанјаху изјави за Еј-Би-Си Њуз дека по завршувањето на војната против Хамас, Израел ќе има „целосна безбедносна одговорност над Појасот Газа на неодредено време“.
