Лекарите повикаа на елиминирање на летното сметање на времето, наведувајќи ја потенцијалната штета што може да произлезе од практиката.
Летното сметање на времето е практика на подесување на часовникот за еден час нанапред, почнувајќи од втората недела во март, со цел подолго да се користи светлината од сонцето.
Штом ќе пристигне зимата, часовниците потоа се поставуваат наназад за еден час во првата недела од ноември, за луѓето да можат да спијат дополнителен час.
Лекарите од Американската академија за медицина на спиењето (AASM) повикаа на прекин на практиката, наведувајќи ги потенцијалните штети што може да настанат поради промените во и од летното сметање на времето.
Наместо тоа, тие се за трајно поставување на стандардно време, а тоа е времето кога часовниците се враќаат назад на есен.
Лекарите велат дека таквото трајно стандардно време најдобро се усогласува со природниот внатрешен часовник на човечкото тело.
„Со тоа што прави часовникот на човечкото тело да биде погрешно усогласен со природната средина, летното сметање на времето ги зголемува ризиците за нашето физичко здравје, менталната благосостојба и јавната безбедност. Постојаното стандардно време е оптимален избор за здравје и безбедност“, рече во изјавата Адел Риши, претседател на Комитетот за јавна безбедност на AASM.
AASM претходно покажа во една студија во 2020 година дека летното сметање на времето е поврзано со „зголемени ризици од сообраќајни несреќи, кардиоваскуларни настани и нарушувања на расположението“.
Претходните истражувања исто така покажаа дека поместувањето на часовникот еден час наназад може да влијае на менталното здравје.
Анализата на податоците од повеќе од 185.000 луѓе во Данска открила раст од над 10 отсто на депресивните епизоди за време на префрлањето од летно во стандардно сметање на времето.
Позицијата за ставање крај на летното сметање на времето е поддржана и од претходните изјави усвоени од организации како што се Националната фондација за спиење и Американската медицинска асоцијација.
„Постојаното стандардно време помага да се синхронизира телесниот часовник со изгревањето и заоѓањето на сонцето. Оваа природна синхронизација е оптимална за здрав сон, а спиењето е од суштинско значење за здравјето, расположението, перформансите и безбедноста“, рече Џејмс А. Роули, претседател на AASM.
