Обвинителите во Ново Мексико ќе го претстават случајот против актерот Алек Болдвин пред големата порота во ноември за ненамерно убиство на продуцентката Халина Хачинс во 2021 година за време на снимањето на филмот „Растење“, објави денеска NBC News, повикувајќи се на два извори запознаени со случајот.
Обвинителите Кари Морисеј и Џејсон Луис рекоа дека во следните два месеци ќе презентираат докази пред големата порота, истакнувајќи дека „дополнителни факти“ излегле на виделина за време на снимањето на „Растење“.
„На виделина излегоа дополнителни факти според кои веруваме дека Болдвин е одговорен за смртта на Халина Хачинс и за ранувањето на Џоел Соуза. Сметаме дека е соодветно да се дозволи големата порота во Ново Мексико да одлучи дали Болдвин треба кривично да биде суден“, рекоа обвинителите во е-пошта.
Болдвин, копродуцент на филмот, впери пиштол во Хачинс за време на пробата за филмот на 21 октомври 2021 година, кога пукна пиштолот, убивајќи ја и повредувајќи го режисерот Џоел Соуза.
Тој првично беше обвинет за убиство од небрежност во јануари.
Болдвин рече дека не е одговорен за смртта на Хачинс и дека не го повлекол чкрапалото.
Обвинителите го отфрлија обвинението против актерот во април, откако се појавија нови докази дека пиштолот што тој го користел можеби бил изменет, дозволувајќи му да пука без да го повлече чкрапалото.
Тие тогаш рекоа дека доколку новото вештачење покаже дека пиштолот функционира, ќе поднесат нова тужба против Болдвин.
Подоцнежното вештачење на револверот со калибар Колт 45 од независен експерт покажа дека пиштолот не може да пука доколку не се повлече чкрапалото, што беше потврдено со претходното тестирање на ФБИ.
