Познатиот хрватски ланец супрмаркети „Конзум“ во Загреб ја отвори првата SMART продавница во регионот. Продавницата без каси на клиентите им нуди уште подобро и поедноставно шопинг искуство. Во неа клиентите можат да влезат, да го скенираат QR кодот од мобилната апликација на Конзум, да ги земат саканите артикли од полицата и едноставно да излезат. Плаќањето за купените артикли ќе се врши автоматски преку сметката на дебитната или кредитната картичка внесена од клиентот во апликацијата, а фактурата ќе биде испратена до апликацијата и на е-поштата.
Едноставно, без гужва и чекање, системот преку апликацијата всушност функционира како „дигитален паричник“ и им овозможува на клиентите од сите генерации премиум шопинг искуство.
„Со отворањето на првата продавница SMART во Југоисточна Европа, покажуваме дека Конзум е лидер во трендовите и иновациите. Со цел да останеме неприкосновен лидер на пазарот и прв избор за вработените и клиентите, ние континуирано инвестираме во модернизацијата на нашата малопродажна мрежа, вклучувајќи целосно нови концепти како што е Конзум СМАРТ. Со секој нов технолошки чекор Конзум станува синоним за модерен начин на пазарење за целото семејство“, изјави Зоран Митрески, извршен директор на малопродажната групација Фортенова и претседател на управниот одбор на Конзум.
Технологијата што се користи за овој концепт на продавница се базира на компјутерска визија за препознавање, а просторот е покриен со 150 камери, благодарение на кои може да се следи кои предмети ги земал купувачот од полицата и да се наплаќаат само оние што ги земал со себе од продавницата.
Во новата продавница SMART, клиентите можат да избираат прехранбени производи, производи за хигиена и предмети за домаќинството од широк асортиман од повеќе од 1.700 артикли за општа намена, со акцент на свежиот оддел, пијалоци и асортиманот TO GO.
