Специјалното обвинителство на Албанија побара од надлежните служби на тамошните истражни органи да им дадат дополнителни три месеци за истрагата што ја водат во врска со шверцот на 430 килограми кокаин од Колумбија преку пристаништето Бар.
Според албанските медиуми, побарано е дополнително време за истрагата за да се добијат дополнителни докази, односно да се откријат објекти кои се користеле како „лаборатории за кокаин“.
Инспекторите на оваа земја соработуваат со црногорските власти за откривање на детали поврзани со шверцот на дрога, а неодамна побарале помош и од нивните колумбиски колеги.
Според достапните информации, откриениот кокаин бил во пратка органско ѓубриво за тартуфи која во јули минатата година пристигнала во пристаништето Бар од колумбиското пристаниште Буенавентура и дека бил пренесен со бродот „Монте Кервино“ кој бил запленет веднаш по откривањето на дрогата.
Но, според вештачењето за оваа акција, кокаинот прво бил однесен од Колумбија во Грција, потоа во пристаништето Бар, па дури потоа во Албанија.
– Контејнерот во кој имало органско ѓубриво со скриени наркотици бил расфрлен на 20 палети, а Црна Гора била транзитна земја. Крајната дестинација беше Албанија – се наведува во соопштението на Полициската управа на Црна Гора во ноември минатата година.
Првиот сигнал дека палетите се натоварени со нешто поскапо, а не со вештачко ѓубриво беше огромната разлика во вредноста на товарот и неговиот транспорт. Оперативните податоци покажуваат дека ѓубривото го нарачал физичко лице од Албанија.
За да се докаже дека во контејнерот има кокаин, било наредено да се скенира, но потоа ништо не било откриено.
Дека сомнежите на црногорските истражители сепак се точни, покажаа и анализите на локалниот форензички центар.
15 лица се уапсени под сомнение дека учествувале во шверц на дрога на територијата на Албанија.