Search

Серафимовски: Во здравството да има усогласување на августовската плата со минималната, инаку можни се протести

– Со августовската плата да има усогласување со минималната, инаку можни се и протести, ова го истакна денеска на прес-конференција, претседателот на Синдикатот на Клинички центар, Предраг Серафимовски.

– На иницијатива на министерот пред околу десетина дена, на состанокот во неговиот кабинет, се формира работна група за усогласување на платите. Според минималната плата, никој во државата не смее да има под минимална плата, 20.175 денари, кај нас тоа не е така. До четврта група на сложеност, луѓето кај нас, тие кои се најзагрозени групи, добиваат од 15.900 до некаде 17-18.000 плата. Тоа, според закон, е кривично дело, изјави Серафимовски.

Министерот за здравство Фатмир Меџити, како што додаде Серафимовски, им пружил поддршка.

– Кажа дека пред најавеното покачување на платите во септември за јавниот сектор, тој ќе се заложи да обезбеди финансии за никој да не стартува под минимална плата. Ние на таа работна група, заедно со претставници, експерти од Фондот за здравство, од ССМ и наши претставници, ги усогласивме барањата, пуштени се уште во петокот, лично до министерот за здравство, до Фондот, до финансискиот директор на Фондот, Миле Сугарев и до ССМ. Ние бараме со августовската плата да се изврши тоа усогласување со минималната. Доколку тоа не се реши, пред покачувањето најавено во септември, ние ќе почнеме да ги користиме сите законски акти и прописи, тоа значи дека може да има приватни и колективни тужби до Фондот за здравство и до Министерството за здравство, а во согласност со членството, со консултации, може да почнат и протести, нагласи Серафимовски.

Доктор Нико Беќаровски рече дека, „со оглед дека по една иницијатива покрената од лекарите како резултат на екстремното незадоволство, што беше наталожено во текот на изминативе месеци поради одлуките што се носеа, како што знаете, се формираше иницијативен одбор за формирање на нов лекарски синдикат“.

Тој, исто така, се осврна на платите во здравството.

– Се дискутираше многу и околу дел на надлежностите што припаѓаат реално на Лекарската комора, Македонското лекарско друштво и Комората на сестри. За жал, во изминатиот период, постои незадоволство од нивната активност, така што се договоривме заедно со Синдикатот, во најкраток период, некаде до почеток на септември, да се организира заеднички состанок со овие комори каде сите овие проблеми ќе се стават на маса, еднаш засекогаш да се разрешат. Да не биде волја на директорот дали нечие образование ќе биде признато или не, туку да постои автоматизам, како што постои во сите останати држави, рече тој.

Се зборувало и околу нивелирање на коефициентите.

– Во моментов, ако ги споредиме коефициентиве што се на пример кај еден судија и кај еден доктор, заостануваме два до два ипол пати во однос на нивните плати. Прашуваме дали на оваа држава ѝ требаат само судии коишто ја вршат работата така како што ја вршат, или им требаат и лекари, додаде меѓу другото Беќаровски.

Според него, ако се нашле пари за судиите и функционерите, би требало да се најдат и за здравство.

– Ако и овој пат повторно бидеме изиграни, на крај приказната ќе биде, сите коишто направиле некое име во државава, ќе заминеме во приватното здравство. Сите имаме понуди, секој момент можеме да прејдеме, а младиве колеги ќе ја напуштат државата, подвлече Беќаровски.

Тој ја поздрави идејата, без согласност од Министерство за финансии, да може да се потполнуваат испразнети места во здравството, нешто што Меџити го најави во вторникот на прес-конференција.

– Тоа е добра идеја и ја поздравуваме, затоа што конкретно на мојата клиника, од 60 и нешто вработени, во моментов 17 се волонтери. Ако ја напуштат клиниката, токсиколошка лабораторија ќе нема во државава. Меѓутоа, да се остави каде има потреба изборот на кадар да го направиме ние. Односно, да не биде „утре ќе распишеме конкурси, ама од разни штабови ќе ви ги пратиме луѓето кои ќе бидат примени“. Со тоа, ќе направиме уште поголема грешка и уште поголемо , нагласи Беќаровски. 

Треба да знаете
Последни објави