Украинските противвоздушни системи беа ангажирани денеска во раните утрински часови во одбивање на руски воздушен напад врз пристаништето Одеса втора ноќ по ред, изјави гувернерот на тој регион.
Русија вчера ги нападна украинските пристаништа, еден ден по повлекувањето од договорот што му дозволуваше на Киев да извезува жито преку Црното Море.
„Не приоѓајте до прозорците, не пукајте и не откривајте ги позициите за противвоздушна одбрана“, им рече гувернерот на Одеса, Олех Кипер на жителите на Телеграм.
Целиот источен дел на Украина беше во состојба на готовност поради воздушен напад, кој започна нешто по полноќ. Во други извештаи од бојното поле, Москва и Киев дадоа сосема различни извештаи за борбите во североисточна Украина вчера.
Шест недели откако Украина започна контраофанзива на исток и југ, Русија подготвува сопствена копнена офанзива на североисток. Москва вели дека украинскиот напад не успеал. Портпаролот на руското Министерство за одбрана изјави дека руските сили напреднале до два километри во правец на Купјанск, важен железнички центар во североисточниот регион Харков.
Но, украинската заменик-министерка за одбрана Хана Малиар рече дека иницијативата во таа област им припаѓа на украинските сили. Таа рече дека украинските сили постигнале нови придобивки во близина на Бахмут на исток, област заземена од руските сили во мај по неколкумесечни борби.
