Домот на холандскиот фудбалски репрезентативец во редовите на Валенсија, Џастин Клајверт, бил цел на крадци, кои освен што предизвикале материјална штета, повредиле и две жени.
„Тројца мажи со качулки упаднале во куќата во Бетера, предградие на Валенсија. Притоа две женски лица се полесно повредени“, соопшти локалната полиција, а подоцна стана јасно дека една од повредените е девојката на холандскиот репрезентативец, која ја повикала полицијата.
Од домот на Клајверт биле украдени пари, накит и часовници, и била нанесена штета од околу 150.000 евра.
Ова е последниот во серијата грабежи чија цел беа домови на познати фудбалери во шпанската Ла Лига. Изминатите месеци беа извршени грабежи во куќите на фудбалерите на мадридски Реал – Бензема, Родриго и Карвахал.
Џастин Клајверт е син на легендарниот холандски напаѓач Патрик Клајверт, а го носи дресот на шпанскиот прволигаш Валенсија од 2022 година.
