Астрономите открија космичка експлозија за која веруваат дека е најголемата забележана досега, јавува Би-Би-Си.
Експлозијата е десет пати посветла од претходно откриените експлозии на ѕвезди познати како супернови.
Оваа експлозија траела и повеќе од три години, што е многу подолго од повеќето супернови, кои обично се видливо светли само неколку месеци.
Според една теорија, експлозијата се случила кога црна дупка проголтала огромен облак од гас.
Блицот беше автоматски откриен и снимен за прв пат во 2020 година од уреди во Калифорнија, но дури една година подоцна астрономите почнаа да го проучуваат подетално.
Настанот го доби името AT2021lwx, а на почетокот астрономите го сметаа за незначителен бидејќи немаше индикации колку е далеку, па не беше можно да се пресмета осветленоста.
Минатата година, сепак, научен тим предводен од д-р Филип Вајсман од Универзитетот во Саутемптон ја анализираше светлината на овој настан и успеа да ја пресмета неговата оддалеченост – осум милијарди светлосни години од Земјата.
Вајсман сметал дека тоа што се случило е многу необично, бидејќи не можел да најде никаков пандан на тоа во научната литература.
Тој верува дека мегаексплозијата била резултат на огромен облак од гас – веројатно илјадници пати поголем од нашето Сонце – кој бил проголтан од супермасивна црна дупка.
Според него, ова испрати бранови низ универзумот и остатоци од прегреаниот облак од отпад што орбитира околу црната дупка како џиновска крофна со дупка во средината.
Во центарот на секоја галаксија се смета дека е една супермасивна црна дупка.
Вајсман смета дека ваквите моќни експлозии можат да играат важна улога во, како што вели, „обликувањето“ на центарот на галаксиите.
„Можеби настани како овој, иако многу ретки, имаат таква енергија што играат клучна улога во тоа како централните делови на галаксиите ќе се менуваат со текот на времето“, рече Вајсман.
Потрагата по други слични експлозии е во тек, а Вајсман се надева дека ќе ги открие со помош на нов телескопски систем кој ќе почне да работи во следните неколку години.
